Kod Osnovne škole “Zaga Malivuk” u Krnjači zabilježene su scene stravičnog nasilja nad maloljetnikom.

Kako je navedeno na Instagram stranici Moj_Beograd2, u toku jučerašnjeg dana dva dječaka su se potukla, pa je tata jednog od njih došao da interveniše i pretukao tuđe dijete.

– Djeca nisu mogla da ga odbrane, pa su snimala za policiju. Policija traga za čovjekom – navedeno je u opisu snimka na kom se vidi kako stariji muškarac krvnički šutira tinejdžera koji leži na betonu.
Dok prima udarce, tinejdžer pokušava da zaštiti tijelo rukama, sve vrijeme vrišteći od bolova. Dok ga šutira mahom u predjelu bubrega, razjareni muškarac u plavoj jakni i crnom donjem dijelu trenerke sve vrijeme viče: Je l’ ti jasno? Je l’ ti jasno?

Za to vrijeme dvojica tinejdžera stoje sa strane i mirno posmatraju nasilje nad njihovim vršnjakom.

Većina onih koji su pogledali snimak imali su različite reakcije na nasilje koje je zabilježeno kamerom. Dok su jedni pokušavali da opravdaju muškarca koji je tukao tinejdžera, drugi su najoštrije osudili nasilničko ponašanje.
– Je l’ tukao svog sina ili tuđeg? Ako je tuđe dijete, ja bih mnogo voljela da ga roditelji tog djeteta pitaju da li mu je jasno dok je on u istoj pozi. A ako je tukao svog sina jer je malo nevaspitano derište, ruke mu se pozlatile – glasio je jedan komentar.

– Stvarno mislite da je okej ovako tući i svoje dijete ako je malo nevaspitano derište? -prokomentarisao je jedan korisnik Instagrama.

– Čekaj, on to šutira dijete koje leži na podu?! Da li tako vaspitava i svoje, s obzirom na to da je vjerovatno agresivno? Ne kaže se džabe da se sve nosi iz kuće – napisala je jedna korisnica Instagrama u odjeljku za komentare, prenosi Blic.